- Главная
- Matbuot markazi
- Uyushma yangiliklar
- O‘zbek tili umumxalq bayrami keng nishonlanmoqda
O‘zbek tili umumxalq bayrami keng nishonlanmoqda
18 Oct 2024
326
18-oktyabr kuni “O‘zsanoatqurilishmateriallari” uyushmasi ijro etuvchi apparatida O‘zbek tiliga davlat tili maqomi berilganining 35-yilligi hamda 21-oktyabr–O‘zbek tili bayrami kuni umumxalq bayramiga bag‘ishlangan adabiy-ma’rifiy tadbir bo‘lib o‘tdi.
Tadbirda Uyushma Boshqaruvi raisining matbuot kotibi-axborot siyosati masalalari bo‘yicha maslahatchisi Jamshid Shermetov so‘zga chiqdi.
Ta’kidlanganidek, hech shubhasiz, azaliy qadriyatlarimiz gultoji bo‘lgan ona tilimiz asrlar sinovidan bezavol o‘tib kelayotgan buyuk va bebaho ma’naviy boyligimizdir.
Ayniqsa, keyingi yillarda o‘zbek tili nufuzli xalqaro anjumanlar, jumladan, Birlashgan Millatlar Tashkiloti minbaridan muntazam yangrab kelayotgani barchamizga g‘urur-iftixor bag‘ishlash bilan birga, dunyoda ona tilimizni o‘rganishga intilayotgan insonlar safini ham tobora kengaytirmoqda.
O‘tgan asr boshlarida ma’rifatparvar jadid bobolarimiz “Tilda, fikrda, ishda birlik” degan ezgu g‘oya asosida maydonga chiqib, xalqimizni mustamlaka zulmidan xalos qilish, uni zamonaviy ilm-fan, kasb-hunar va madaniyatga oshno etish bo‘yicha ulkan ishlarni amalga oshirgan edilar.
Ana shunday mushtarak maqsadlar, umummilliy birlik va ahillik bugun biz uchun har qachongidan ham muhim ahamiyat kasb etmoqda. Hozirgi o‘ta keskin va tahlikali zamonda faqatgina shu asosda o‘z milliy manfaatlarimizni qat’iy himoya qilishga, jumladan, ona tilimizni asrab-avaylash va boyitish, uni ilm-fan, iqtisodiyot, ta’lim, tibbiyot, axborot-kommunikatsiya, diplomatiya va boshqa muhim yo‘nalishlarda ta’sirchan muloqot vositasiga aylantirib, taraqqiyot sur’atlariga uyg‘un holda rivojlantirishga, xalqaro nufuzini munosib darajaga ko‘tarishga erisha olamiz.
So‘nggi yillarda mamlakatimizda o‘zbek tilini rivojlantirish, uning hayotimizdagi o‘rni va ta’sirini oshirish borasida yangi bosqich boshlanganligiga har birimiz guvohmiz.
Bugungi kunda jahon miqyosida 50 millionga yaqin kishi o‘zbek tilida so‘zlashmoqda. Ko‘plab mamlakatlarda bu go‘zal va jozibali til katta ishtiyoq bilan o‘rganilmoqda.
Bugungi kunda o‘zbek tilini dunyo xalqlari sevib o‘rganmoqda hamda Ona tilimizda so‘zlashmoqdalar.
Tadbirda O‘zbekiston Yozuvchilar uyushmasi a’zosi, yosh, umidli shoir Bobomurod Sa’dulla ishtirok etdi.
Bobomurod Sa’dulla O‘zbekiston Qahramoni, O‘zbekiston xalq shoiri Abdulla Oripovning “Ona tilim”, “O‘zbekiston Vatanim manim” she’rlarini o‘qib berib, hassos shoir, o‘zbek tilining jonkuyarlaridan biri Abdulla Oripovning o‘zbek tili rivoji va mavqeini ko‘tarishdagi fidoyiligi to‘g‘risida qatnashchilar bilan o‘z xotiralarini bo‘lishdi.
O‘zbekiston Yozuvchilar uyushmasining vakili o‘z ijod namunalaridan ishtirokchilarga o‘qib berdi.
Uyushma ijro etuvchi apparati hamda “O‘zqurilishmaterialLITI” MCHJ ilmiy-tadqiqot va injiniring markazi, “Tog‘-geologiya jamlama ekspeditsiyasi” MCHJ, “O‘zbuildinvest” MCHJ xodimlari ishtirok etgan uchrashuv g‘oyat qiziqarli va sermazmun bo‘ldi.
Tadbir so‘nggida notiq tomonidan ishtirokchilarning turli savollariga hayotiy misollar keltirilib berilgan batafsil javoblar barcha qatnashchilarda katta qiziqish uyg‘otdi.
