Birja savdolariga kuniga 40 ming tonna sement qo‘yilmoqda

5 May 2021

Bo'lishish

Facebook

Telegram

342

“O‘zsanoatqurilishmateriallari” uyushmasi tomonidan asosiy turdagi qurilish materiallarining narxlarini ichki bozorda barqarorlashtirish maqsadida yangi ishlab chiqarish quvvatlarini ishga tushirilmoqda, yirik investitsiya loyihalari amalga oshirilmoqda.

Mahalliy va jahon bozorini o‘rganishlar natijasida ichki bozorda qurilish materiallarining narxining keskin oshib ketishining oldini olish va ularning narxini arzonlashtirish borasida aniq chora-tadbirlar belgilab borilmoqda.

Xususan, Vazirlar Mahkamasining 29.06.2020 yildagi №02/1-58-sonli topshirig‘i bilan sement mahsuloti narxining keskin o‘sib ketishini oldini olish maqsadida:

• birja savdolariga kunlik rejadagi 32 ming tonna o‘rniga 40 ming tonna sement qo‘yish ta’minlandi;

• birja savdolarida bir oy muddatga kechiktirgan holda sement yetkazib berish bo‘yicha “forvard” savdo turi joriy etildi;

• birja savdolarida sotib olinadigan sementni avtomobil transportidan foydalangan holda yuklab jo‘natish muddati 2020 yilning 1 iyulidan boshlab 10 kundan 5 kungacha qisqartirildi.

Ichki bozorda sement narxi barqarorligini ta’minlash maqsadida Vazirlar Mahkamasining 2020 yil 23 iyuldagi 450-sonli qarori qabul qilinib, importdan sement olib kirish tartibi soddalashtirildi. Joriy yilning o‘tgan davrida 765,3 ming tonna sement import qilingan bo‘lib, 2020 yilning shu davriga nisbatan import kilingan sementning 2,7 baravarini tashkil etgan.

Vazirlar Mahkamasining 14.03.2021 yildagi № 109-F-sonli farmoyishi bilan 2021 yilda sement ishlab chiqarish va iste’mol qilish balansining parametrlari tasdiqlangan bo‘lib, unga ko‘ra joriy yilda 16,4 mln tonna sement ishlab chiqarish (o‘tgan yilga nisbatan 131 %) va shundan 9,5 mln tonnasini birja savdolari orqali sotish belgilangan.

Joriy yilning o‘tgan I-choragida jami 2,9 mln tonna sement ishlab chiqarilgan bo‘lib, o‘tgan yilning shu davriga nisbatan o‘sish 124,6 foizni tashkil etgan. Ushbu davrda birja savdolarida sotilgan 1,9 mln tonna sement (115 %) iste’molchilarga yetkazib berilgan.

Bugungi kunda, birja savdolarida 1 tonna sementning o‘rtacha narxi 594,8 ming so‘mni tashkil etib (joriy yil boshida 592,5 ming so‘m) 0,4 foizga, 1 kv metr qurilish oynasining narxi 27,5 ming so‘mni tashkil etib (25,7 ming so‘m) 6,8 foizga, 1 dona shiferning narxi esa 37,0 ming so‘mni tashkil etib (34,0 ming so‘m) 8,8 foizga o‘sgan.

Joriy yil yakuni bilan yiliga 4,9 mln tonna sement ishlab chiqarish quvvatlari ishga tushiriladi va jami sement ishlab chiqarish quvvatlari 20 mln tonnaga yetkaziladi. Shuningdek, yiliga 22,2 mln kv metr qurilish oynasi ishlab chiqarish bo‘yicha yangi quvvat ishga tushirilib, jami qurilish oynasi ishlab chiqarish bo‘yicha quvvatlar 42 mln kv metrni tashkil etadi.