“ЭВРОЦЕМЕНТ груп” холдинги таркибига кирувчи “ОҲAНГAРОНЦЕМЕНТ” корхонасида оловга бардошли ғишт ишлаб чиқарадиган янги линия ишга туширилди.

Ўзбекистон Республикаси Президентининг 2016-йил 25-октябрдаги “Республика қурилиш материаллари саноатини бошқаришни ташкил этишни янада такомиллаштириш чора-тадбирлари тўғрисида”ги қарори қурилиш материаллари ишлаб чиқариш саноатини янада ривожлантириш ва диверсификация қилиш, тармоқ корхоналарини модернизациялаш, техник ва технологик қайта жиҳозлаш учун хорижий инвестицияларни жалб этиш ҳамда унинг экспорт потенциалини ошириш каби ишларга янгича суръат бағишлади.

“ОҲAНГAРОНЦЕМЕНТ” корхонасида юқори ҳароратга бардошли пишиқ ғишт ишлаб чиқаришга ихтисослаштирилган янги линия ишга туширилгани бунинг исботидир.

Унинг очилиш маросимига бағишлаб ўтказилган тадбирда сўзга чиққанлар юртимизда давлатимиз томонидан кичик бизнес ва хусусий тадбиркорликни янада ривожлантириш, уларни ҳар томонлама қўллаб-қувватлаш, инвестиция ва ишбилармонлик муҳитини яхшилашга алоҳида эътибор қаратилаётганини таъкидладилар.

— Мамлакатимиз иқтисодиёти, архитектура ҳамда шаҳарсозлиги равнақида тадбиркорлик субъектлари, хусусан, қурилиш материаллари ишлаб чиқариш корхоналарининг ўрни беқиёс, — дейди корхонанинг семент ишлаб чиқариш бўлими бошлиғи Улуғбек Умаралиев. — Умумий қиймати 6 миллиард сўмлик мазкур линияда йилига 3,5 минг тонна юқори сифатли оловга чидамли пишиқ ғишт ишлаб чиқарилади. У 1000-1300 даража ҳароратгача бардошлидир.

Тадбир иштирокчилари маҳсулотни ишлаб чиқариш жараёни билан яқиндан танишиб, яримқуруқ хом ашё ярим автоматлаштирилган махсус технологиялар ёрдамида юқори босим остида қаттиқ жипсланиши, юқори ҳароратда пишитилиши, тайёр ғиштнинг экологик тозалиги таъминланишига гувоҳ бўлдилар.

— Ҳозирги кунда Ўзбекистон бозорида бундай ғиштларга эҳтиёж йилига 7 минг тоннани ташкил этади. Эндиликда технологик линия томонидан унинг ярми қондирилади. Келгусида эса корхонанинг йиллик ишлаб чиқариш қуввати 10 минг тоннага етказилиши нафақат ички бозорнинг талабини тўлиқ таъминлаш, балки экспорт қилиш имконини беради, - таъкидлади корхона бош директори Геннадий Куликов.