Қурилиш материаллари тармоғи: хорижий инвесторлар эътиборида

Жонажон Она Ватанимизда бунёдкорлик ишлари кун сайин кенг қулоч ёзиб, янги-янги бино ва иншоотлар, кўп қаватли турар жойлар, маданий-маиший объэктлар, йўллар, кўприклар ва бошқа объэктлар жадал суръатлар билан қурилиши билан бирга, замонавий ишлаб чиқариш корхоналари ҳам кенг кўламда қурилиб, ишга туширилаётганлигига бугунги кунда барча юртдошларимиз гувоҳ бўлмоқдалар.

Қурилиш қанча кўп бўлса, қурилиш материалларига бўлган талаб ва эҳтиёж ҳам шунчалик ортиб бораверади.

Истеъмол бозорини замонавий қурилиш материаллари билан тўлдириш ва унга бўлган талаб ва эҳтиёжни қондириш мақсадида, Муҳтарам Президентимиз Шавкат Миромонович Мирзиёев томонидан саноатнинг бошқа соҳалари қатори, қурилиш материаллари ишлаб чиқариш тармоғини ривожлантиришга ҳам алоҳида эътибор қаратилмоқда.

Бу борада, республикамизнинг соҳага мутасадди идораси бўлган “Ўзқурилишматериаллари” акциядорлик жамияти томонидан янги-янги лойиҳаларни аниқлаш, ташаббускорларнинг ғояларини қўллаб-қувватлаш, уларни Муҳтарам Президентимиз ҳамда давлатимиз томонидан яратиб берилган имкониятлар ва имтиёзлар билан таништириш, бир сўз билан айтганда ҳар томонлама қўллаб-қувватлаш борасида, барча саъй-ҳаракатлар амалга оширилмоқда.

Ўзбекистон Республикасининг амалдаги қонунчилигига мувофиқ, хорижий инвесторга халқаро нормаларда белгиланган барча имтиёз ва устуворликлар, шу жумладан хорижий инвесторларнинг мулки даҳлсизлиги, молиявий мустақиллик, маблағларни эркин тасарруф этиш, ташқи савдода, шунингдек меҳнат муносабатларида эркинлик тақдим этилганлиги билан бирга, солиқ, божхона, валюта имтиёзлари берилган ҳамда коммунал хизматлар учун тўловларда ҳам маҳаллий инвесторлар каби бир хил ёндашув шароитлари яратилган.

Aйниқса, республика ҳудудларида Эркин иқтисодий ҳудудларда алоҳида тартиб ўрнатилган бўлиб, уларнинг иштирокчиларига, айниқса тўғридан-тўғри хорижий инвестиция киритган чет эллик тадбиркорларга ер, даромад, мол-мулк ва бошқа солиқ ҳамда мажбурий тўловлар бўйича имтиёз ва енгилликлар берилган.

Тегишли имтиёзлар киритилган инвестиция ҳажмидан келиб чиқиб 3 йилдан 10 йилгача бўлган муддатга, хусусан:

300 минг AҚШ долларидан 3 млн. AҚШ долларигача – 3 йилга;

3 млн. AҚШ долларидан 5 млн. AҚШ долларигача – 5 йилга;

5 mln.AQSh долларидан 10 млн. AҚШ долларигача – 7 йилга;

10 млн. AҚШ доллари ва ундан зиёдга – 10 йилга тегишли имтиёзлар ва енгилликлар тақдим этилган.

Хорижий инвесторларга яратилган имтиёз ва енгилликлар самараси натижасида, “Жиззах” эркин иқтисодий ҳудуди”да ҳам хорижий инвесторлар томонидан йирик инвестиция лойиҳалари муваффақият билан амалга оширилмоқда.

Хусусан, Хитойлик инвесторлар билан ҳамкорликда, Жиззах шаҳрида ташкил этилган “Мингуан Силу индустрй” масъулияти чекланган шаклидаги қўшма корхонаси томонидан, умумий қиймати 110 млн AҚШ долларлик, йилига 24 млн. квадрат метр ойна маҳсулоти ишлаб чиқариш қувватига эга лойиҳанинг, 2017 йилнинг декабр ойида ишга туширилган биринчи босқичида, 29 mln.dollar маблағ ўзлаштирилиб, йилига 4 млн. квадрат метр турли безакли ойна ишлаб чиқариш йўлга қўйилди ва 210 та янги иш ўринлари яратилди.

Шунингдек, Фориш туманида “Мега Инвест Индустриал” масъулияти чекланган жамияти шаклидаги Ўзбекистон - Буюк Британия қўшма корхонаси томонидан, умумий қиймати 61,1 mln.dollarлик, шундан 36,4 mln.dollar банк кредити, 17,6 млн.доллар хорижий инвестиция, 7,1 млн. доллар эквивалентидаги корхонанинг ўз маблағи ҳисобига, йилига 2500 тонна базалт толасидан замонавий қурилиш материали бўлган арматура ишлаб чиқариш лойиҳасининг биринчи босқичи ишга туширилди ҳамда 90 та янги иш ўрни яратилди.

Мазкур юқори сифатли замонавий қурилиш материаллари ички бозорда сотилиши билан бирга, хорижга экспорт қилинади.