Цемент ишлаб чиқариш ҳажми ортади

Тошкент вилояти Aнгрен шаҳрида швециялик ишбилармонлар билан ҳамкорликда ташкил этилган цемент ишлаб чиқариш корхонасига тамал тоши қўйилишига бағишланган тадбир бўлиб ўтди.

Унда чет эллик инвесторлар, шаҳар ҳокимлиги, Тадбиркорлар ва ишбилармонлар ҳаракати – Ўзбекистон Либерал-демократик партияси Aнгрен шаҳар кенгаши масʼуллари, қурувчилар, кенг жамоатчилик вакиллари иштирок этди.

Мамлакатимизда амалга оширилаётган уй-жой, ижтимоий соҳа обектлари қурилиши, йўлсозлик каби аҳолининг бирламчи эҳтиёжини қаноатлантириш бўйича олиб борилаётган ишлар кўлами тобора кенгайиб бораётгани таъкидланди. Бу, ўз навбатида, қурилиш материаллари, хусусан, цементга бўлган талабни ошираётгани, янги корхона маҳсулотлари эса ички бозордаги ушбу талабни қондиришга хизмат қилиши қайд этилди.

“AБA ГТС ГРОУП“ масʼулият чекланган жамияти шаклида ташкил этилаётган мазкур корхонанинг ишга туширилиши кунига 1 минг 200 тонна маҳсулот ишлаб чиқариш имконини беради. 400 кишининг доимий бандлиги таъминланади. Маълумотларга кўра, мажмуанинг қурилиш ишларини келаси йил ноябр ойига қадар якунлаш режалаштирилган.

Таъкидлаш жоизки, мазкур корхона октябр ойида Тошкент вилоятида цемент ишлаб чиқариш бўйича тамал тоши қўйилган иккинчи лойиҳа саналади. Aввалроқ, қўшни Оҳангарон ҳудудида россиялик ишбилармонлар билан ҳамкорликда йилига 3 миллион тонна цемент ишлаб чиқариш қувватига эгакорхона қурилиши бошлангани ҳақида хабар қилган эдик.

"@Ozqurilishmateriallari" телеграм, "@aouzsm" фаcебоок, "узбуилдматериалс" инстаграм каналлари орқали янги маълумотлардан хабардор бўлинг.