Қамишдан ДСП маҳсулоти ишлаб чиқарилмоқда

Оддийгина қамишдан мебель тайёрланишига ишонасизми? Сурхондарё вилоятида 10 минг гектар ер майдонида ёввойи тарзда қамиш ўсади. Термиз ва Музработ тумани аҳолиси яхши билишади, бундан бир неча йил олдин, Куз мавсумида қамишзорларнинг ёқилиши оқибатида қамишнинг қора куйиндиси теварак-атрофни ифлослантириб, кишини хуноб қилар эди. Қамишзорлар ёқилиши табиатга, ҳайвонот оламига жиддий зарар етказиб, атмосферани ифлослар эди. 2017 йилдан бошлаб бундай салбий ҳолатларга чек қўйилди.

Маҳаллий қамишдан ДСП маҳсулотини ишлаб чиқариш йўлга қўйилди. 2017 йилнинг сентябрь ойидан бошлаб, “Сурхон саноат қурилиш” компанияси таркибидаги “Сурхон КСП-Гранд” МЧЖда йилига 30 минг куб метр ДСП ишлаб чиқарадиган корхона ишга тушди.

Айни кунларда ДСП маҳсулотлари қўшни Афғонистон ва Тожикистон Республикаларига ҳам экспорт қилинмоқда. Тинимсиз изланишлар натижасида компания томонидан 2018 йилда ДСП маҳсулотини силлиқлаш ва ламинациялаш лойиҳасини амалга оширди. Эндиликда тайёр ЛДСПдан (ламинацияланган ДСП) исталган турдаги мебель маҳсулотини ҳам ишлаб чиқариш мумкин. Яқин кунларда “Сурхон саноат қурилиш” компанияси томонидан яна бир ишлаб чиқариш корхонаси ишга тушади. Бу- маҳаллий ЛДСП маҳсулотидан конвейер усулида мебель ишлаб чиқариш лойиҳаси. Лойиҳа 2019 йилда охирига қадар тўлиқ ишга тушиши кўзда тутилган.

Натижада мебель ишлаб чиқаришнинг 90% қисмини маҳаллийлаштиришга эришилади.