Цемент ишлаб чиқариш ҳажми оширилди

«Ўзсаноатқурилишматериаллари» уюшмаси томонидан қурилишнинг асоси бўлган цемент маҳсулотини ишлаб чиқариш борасида тизимли ишлар йўлга қўйилган. Айни пайтда мамлакатимизда цемент ишлаб чиқаришга ихтисослаштирилган 30 та корхона мавжуд бўлиб, жорий йил якунигача цемент ишлаб чиқариш бўйича қувватлар 20 миллион тоннага етказилади.

Ҳозирги кунда, «Қизилқумсемент», «Оҳангаронсемент», «Қувасойсемент», «Бекободсемент» ва “Олмалиқ Тоғ-кон Металлургия Комбинати” акциядорлик жамиятлари сингари йирик ишлаб чиқарувчиларнинг ҳиссаси айниқса катта.

2020-2021 йилларда уюшма масъуллигида Қорақалпоғистон Республикаси, Жиззах, Қашқадарё, Сурхондарё, Тошкент, Андижон, Фарғона ва Наманган вилоятларида умумий қуввати 14 млн. тонна бўлган яна 18 та янги цемент заводларини ишга тушириш режалаштирилган.

Таҳлилларга кўра, юртимиздаги цемент ишлаб чиқарувчи корхоналар томонидан 2020 йил 1-ярим йиллик якуни билан цемент ишлаб чиқариш ҳажми 5 млн 442,1 минг тоннани ташкил этиб, ўтган йилнинг мос даврига нисбатан 107,3 фоизга ўсиш таъминланди. Ахолига сифатли цемент етказиб беришда «Қизилқумсемент» АЖ (йиллик қуввати 3,5 млн тонна), «Оҳангаронсемент» АЖ (йиллик қуввати 1,8 млн тонна), Шеробод цемент заводи (“Олмалиқ ТМК” АЖ) (йиллик қуввати 1,5 млн тонна), «Бекободсемент» АЖ (йиллик қуввати 1,1 млн тонна), «Қувасойсемент» АЖ (йиллик қуввати 1,08 млн тонна), Жиззах цемент заводи ("Олмалиқ ТМК" АЖ) (йиллик қуввати 1 млн тонна), "Турон Эсо Семент Гроуп" МЧЖ (йиллик қуввати 700 минг тонна), "Сурхан цемент инвест" ХК (йиллик қуввати 450 минг тонна) каби цемент заводлари жонбозлик кўрсатишди.