«Кварс» АЖда йирик инвестиция лойиҳаси амалга оширилмоқда

Мамлакатимиздаги йирик шаҳарларни улкан мегаполисга айланиб бормоқда. Эътиборлиси, шаҳарсозликда жаҳон тажрибасини кенг қўллаш натижасида инфратузилма объектлари, бино ва иншоотлар, турар жой мавзеларини тамомила ўзгача қиёфада бунёд этилмоқда.

Маълумки кейинги йилларда Ўзбекистон улкан бунёдкорлик, қурилиш майдонига айланган. Шаҳару қишлоқларда қурилиш ишлари қизғин давом этмоқда. Шу боис йилдан-йилга энергия тежамкор, импорт ўрнини босувчи, инновацион, янги турдаги қурилиш материалларига бўлган талаб ҳам ортиб бормоқда. Хусусан, қурилиш ойнасига бўлган эҳтиёж нафақат маҳаллий балки жаҳон бозорларида ҳам кун сайин ўсиб боряпти. «Ўзсаноатқурилишматериаллари» уюшмаси томонидан қурилиш ойнаси ишлаб чиқаришни янада кенгайтириш, маҳсулот турини кўпайтириш, мазкур йўналишда йирик инвестиция лойиҳаларини амалга оширишга алоҳида эътибор қаратилган.

Ана шундай йирик инвестиция лойиҳаларидан бири «Кварс» АЖда амалга оширилмоқда. Қурилиш ойнаси ишлаб чиқариш бўйича етакчи ҳисобланган корхонада умумий қиймати 70,2 млн доллар бўлган флоат (қурилиш) ойнаси ишлаб чиқариш янги технологик линияси бунёд этиляпти. Инвестиция лойиҳасини 2019-2020 йилларда ишга амалга ошириш белгиланган бўлиб, унга 41,5 млн доллар миқдоридаги инвестиция ва кредитлар йўналтирилган. Янги линияда йилига 22,2 млн кв метр 2 мм шартли қалинликдаги бўлган флоат ойнаси ишлаб чиқарилади. Энг муҳими 280 та янги иш ўринлари яратилади. Айни дамда 85 фоиз қурилиш монтаж ишлари амалга оширилди. Лойиҳа режасига кўра, бу ерда замонавий, энергия тежамкор ускуналар ўрнатилиши белгиланган. Европа ва Хитой давлатидан қурилиш ойнаси ишлаб чиқариш бўйича етакчи компаниялардан ускунлар олин келинмоқда. «Кварс» АЖдаги янги линия шу йилнинг сўнггига қадар фойдаланишга топширилиши кўзда тутилган.

Лойиҳа амалга оширилгач энергия сарфи 2 баробарга камаяди. Маҳсулот таннархи 20-30 фоизга азонлашади. Шунингдек, заводнинг қурилиш ойнаси ишлаб чиқариш бўйича йиллик қуввати 10 млн кв. метрдан 32 млн кв. метрга (шартли 2 мм қалинликда) етказилади. Шу билан бирга маҳаллий бозорда қурилиш ойнасига бўлган талаб деярли копланиб, экспорт кўлами кенгайтирилади.

Маълумот учун, Навоий вилоятининг Зарафшон шаҳрида ҳам йилига 10 млн кв метр 2 мм. шартли қалинликдаги қурилиш ойнаси ишлаб чиқаришга ихтисослашган корхона барпо этиляпти.

Ҳозирги кунда мамлакатимизда қурилиш ойнаси «Кварс» АЖ ва “Мингюан СиЛу Индустрй” МЧЖ (Хитой) қўшма корхоналари томонидан ишлаб чиқарилмоқда.