Газобетон ишлаб чиқариш ҳажми оширилади

Бутун дунёда қурилиш жараёнида сўнгги йилларда энергия тежамкор, инновацион қурилиш материалларидан фойдаланишга алоҳида эътибор бериб келинмоқда. Бу эса бино-иншоотнинг таннархини арзон бўлиши ва қурилиш ишларини тез фурсатда, сифатли амалга оширишда муҳим омил бўлиб хизмат қилмоқда. Ривожланган давлатларда ғишт ўрнига энергия тежамкор газобетондан фойдаланиш кенг оммалашган бўлиб, мамлакатимизда ҳам ушбу қурилиш материалларини ишлаб чиқаришни кенг йўлга қўйиш, бу йўналишда жаҳон тажрибасини қўллашга алоҳида эътибор бериб келинмоқда. Хусусан, «Ўзсаноатқурилишматериаллари» уюшмаси томонидан газобетон ишлаб чиқариш бўйича бир қатор инвестиция лойиҳалари амалга оширилмоқда. Натижада янги корхоналар фаолияти йўлга қўйиляпти.

Таҳлилларга кўра, уюшма масъуллигида 2019 йилда автоклав газобетон ишлаб чиқаришга ихтисослашган йиллик қуввати 550 минг метр куб бўлган 4 та корхона фаолияти йўлга қўйилган. Тошкент вилоятининг ўзида йилига 200 минг метр куб ишлаб чиқариш имкониятига эга “Мега Блоск Инвестмент” МЧЖ ва “Тошкент Темир Бетон” УК корхоналари ишга туширилди. Шунингдек, Бухоро ва Жиззах вилоятларида ҳам газобетон ишлаб чиқариш бўйича лойиҳалар амалга оширилган.

Жорий йилда «Ўзсаноатқурилишматериаллари» уюшмаси вилоят ҳокимликлари билан ҳамкорлигида ушбу йўналиш бўйича 7 та инвестиция лойиҳа амалга оширилади. Автоклав газобетон ишлаб чиқарувчи энг йирик корхоналар Тошкент вилоятида ишга туширилиши режалаштирилган. Хусусан, ҳудудда “Эсотон шарқ” МЧЖ ва «Алижон» МЧЖ каби тадбиркорлик субъектлари яратилади. Ҳозирда Оҳангарон шаҳрида “Эаст мининг инвест” МЧЖ ҚК томонидан йиллик ишлаб чиқариш қуввати 500 минг метр куб бўлган корхона фаолияти йўлга қўйилган.

Навоий, Қашқадарё ва Сирдарё вилоятларида ҳам мазкур йўналишда 3 та лойиҳани амалга ошириш ишлари жадал суръатларда олиб бориляпти. Айни дамда ушбу корхоналарга ускуналар ва мутахассисларни олиб келиш ишлари амалга оширилмоқда. Шу билан бирга бино ва иншоотларни қуриш ишлари давом этмоқда.

Маълумот учун, Газобетон – ғовак (тешик-тешик) бетоннинг бир тури бўлиб, замонавий қурилиш материали. Уни баъзан “сунъий тош” деб ҳам аташади. Оддий бетондан фарқи – таркибида 1-3 миллиметрли пуфаклар мавжуд бўлиб, улар туфайли бетон енгил, етарли даражада мустаҳкам, иссиқ ва совуқдан яхши ҳимоялаш хусусиятларига эга бўлади. Шунингдек, табиий газни 8 марта кам сарфлаши, энергия тежамкорлиги ва энг асосийси, унумдор тупроқнинг ишлатилмаслиги билан пишиқ ғиштдан бир неча маротаба афзаллиги билан ажралиб туради.1 метр куб метр ғишт 1800-2000 кг оғирликка эга бўлса, шу ҳажмдаги газобетоннинг оғирлиги атиги 500-700 кг ни ташкил этади.