“BNBM BUILDING MATERIALS CENTRAL ASIA” MCHJ bilan tanishing

16 Feb 2026

Bo'lishish

Facebook

Telegram

186

Farg‘ona viloyatida sanoat salohiyatini mustahkamlash va qurilish materiallari bozorini sifatli mahsulotlar bilan ta’minlash borasida amalga oshirilayotgan islohotlar o‘z samarasini bermoqda. Ana shunday zamonaviy korxonalardan biri — “BNBM BUILDING MATERIALS CENTRAL ASIA” MCHJ bo‘lib, u 2023-yilda o‘z faoliyatini boshladi.

Korxona Farg‘ona viloyatining Qo‘qon erkin iqtisodiy zonasi hududida joylashgan bo‘lib, qulay infratuzilma va imtiyozli sharoitlar asosida faoliyat yuritmoqda. Bu esa ishlab chiqarish jarayonlarini samarali tashkil etish va mahsulot tannarxini maqbul darajada ushlab turish imkonini bermoqda.

“BNBM BUILDING MATERIALS CENTRAL ASIA” MCHJ gipsokarton mahsulotlarini ishlab chiqarishga ixtisoslashgan. Korxonada Xitoy Xalq Respublikasidan keltirilgan eng zamonaviy, yuqori texnologiyali uskunalar o‘rnatilgan. Ilg‘or ishlab chiqarish liniyalari mahsulotning geometrik aniqligi, mustahkamligi va namlikka chidamlilik kabi jismoniy xususiyatlarini yuqori darajada ta’minlaydi.

Ishlab chiqarilayotgan gipsokartonlar:

• mustahkamlik va chidamlilik,

• yengil vazn,

• montajga qulaylik,

• ekologik xavfsizlik,

• turli texnik ko‘rsatkichlar bo‘yicha keng tanlov imkoniyati

kabi afzalliklari bilan ajralib turadi. Bu esa xaridorlarga narx va jismoniy xususiyatlar nisbati bo‘yicha eng maqbul variantni tanlash imkonini yaratadi.

Korxonaning yillik ishlab chiqarish quvvati 50 million kvadrat metrni tashkil etadi. Bu ko‘rsatkich nafaqat ichki bozor ehtiyojini qondirish, balki eksport salohiyatini ham kengaytirish imkonini beradi.

Barcha mahsulotlar sertifikatlangan bo‘lib, xalqaro standartlarga to‘liq javob beradi. Sifat nazorati ishlab chiqarishning barcha bosqichlarida amalga oshiriladi.

Loyiha doirasida mahalliy aholi uchun 200 ta yangi ish o‘rni yaratildi. Bu esa hududda bandlikni ta’minlash va aholi daromadlarini oshirishda muhim ahamiyat kasb etmoqda.

Bugungi kunda korxona mahsulotlari nafaqat ichki bozorda, balki xorijiy davlatlarga ham eksport qilinmoqda. Jumladan, gipsokarton mahsulotlari Qirg‘iz Respublikasi, Tojikiston hamda Afg‘oniston bozorlarida o‘z o‘rniga ega bo‘lmoqda.

“BNBM BUILDING MATERIALS CENTRAL ASIA” MCHJ faoliyati mamlakatimizda qurilish materiallari sanoatini diversifikatsiya qilish, import o‘rnini bosuvchi mahsulotlar ishlab chiqarish va eksportbop tovarlar hajmini oshirishga xizmat qilmoqda.

Zamonaviy texnologiyalar, yuqori sifat va keng ishlab chiqarish quvvatiga ega ushbu korxona Farg‘ona viloyati sanoat salohiyatini yanada mustahkamlab, Yangi O‘zbekistonning qurilish sohasidagi barqaror taraqqiyotiga munosib hissa qo‘shmoqda.