Poytaxtimizda yana bir yirik sanoat voqeasi!

15 Dec 2025

Bo'lishish

Facebook

Telegram

282

“O‘zekspomarkaz” milliy ko‘rgazmalar markazida Respublika tarmoqlararo sanoat yarmarkasi o‘z ishini boshladi. Ushbu yirik tadbir O‘zbekiston Respublikasi Investitsiyalar va tashqi savdo vazirligi, Toshkent shahar hokimligi hamda Raqamli transformatsiya markazi hamkorligida tashkil etildi.

Bu yilgi yarmarka avvalgilaridan farqli o‘laroq, yanada keng qamrovda o‘tkazilmoqda. Unda yirik tarmoq korxonalari tomonidan xarid qilingan import o‘rnini bosuvchi mahsulotlar ham namoyish etilmoqda. Bu esa mahalliy sanoat korxonalari uchun yangi biznes-g‘oyalar yaratish, ishlab chiqarish hajmlarini oshirish va raqobatbardosh mahsulotlar nomenklaturasini kengaytirishga xizmat qilmoqda.

Yarmarka doirasida viloyatlardan tashrif buyurgan 400 dan ortiq korxonalar o‘z mahsulotlari bilan qatnashmoqda. To‘qimachilik va ipakni qayta ishlash, charm-poyabzal, mebelsozlik, neft-gaz, qurilish materiallari, kimyo, elektrotexnika, avtomobilsozlik va boshqa sohalarga mansub korxonalar ishlab chiqarilayotgan mahsulot namunalari, istiqbolli loyihalari hamda sanoat kooperatsiyasi orqali mahalliylashtirishga taklif etilayotgan mahsulotlarini taqdim etmoqda.

Ayniqsa, qurilish materiallari sanoati paviloni mehmonlarda katta taassurot qoldirdi. Bugungi kunda ushbu sohadan 100 dan ortiq korxona yarmarkada o‘z mahsulotlari bilan ishtirok etmoqda. Toshkent shahri yirik megapolis sifatida qurilish materiallari sanoatining rivojlangani bilan ajralib turadi. Bu yerda tabiiy pardozbop toshlardan tortib, suyuq oboygacha bo‘lgan keng turdagi mahsulotlar ishlab chiqariladi. Yarmarka davomida korxonalar nafaqat mahsulotlarini namoyish etmoqda, balki qator manfaatli shartnomalarni ham imzolashga muvaffaq bo‘lmoqda.

Respublika tarmoqlararo sanoat yarmarkasi mahalliy ishlab chiqaruvchilarni bir platformada jamlab, o‘zaro tajriba almashish va hamkorlikni kuchaytirishga xizmat qilmoqda. Ko‘rgazma 19-dekabrgacha davom etadi.